“ПОАКТИВНИ ЛУЃЕ ЗА ПОЗДРАВ СВЕТ”

Светската здравствена организација (СЗО) поттикнува здрав начин на живот и редовна физичка активност како еден од најважните предуслови за добро здравје.

За таа цел, во 2003 година, е покрената иницијатива за спроведување на активности за промовирање на редовна физичка активност на 10 мај на национално ниво, со цел да се поттикне секој поединец, да се движи за подобро глобално здравје!

Тој ден е познат како Меѓународен ден на физичката активност, односно „Ден на движење за здравјето“. Веќе е општо познато дека вежбањето има значително влијание врз здравјето на нашето срце, тело и мозок, придонесувајќи за спречување на кардиоваскуларните болести, рак и дијабетес, намалување на симптомите на депресија и анксиозност, истовремено обезбедувајќи здрав раст и развој кај децата и младите. Сепак, 1 од 4 возрасни не ги исполнува препорачаните нивоа на физичка активност. Освен тоа, Светската здравствена организација проценува дека околу 5 милиони смртни случаи годишно би можеле целосно да се спречат доколку луѓето практикуваат редовна физичка активност.

Во согласност со препораките на Светската здравствена организација, активностите што се организираат во оваа пригода со цел зачувување и подобрување на здравјето на поединецот треба да се спроведуваат насекаде и да бидат со умерен до висок интензитет.

Според препораките на Светската здравствена организација, во текот на денот е потребно да се издвојат најмалку:

– 180 минути за физичка активност со различен интензитет за деца до шест години,

– 60 минути умерена до интензивна физичка активност за деца и млади на возраст од 6 до 18 години, т.е.

– 30 минути умерена до интензивна физичка активност за возрасни.

Изборот на видот на активности (пешачење, пливање, трчање, вежби), нејзината зачестеност и времетраење зависат од полот, возраста, здравствената состојба, а особено од кондиционата подготвеност.

Со оглед на тоа што движењето и извршувањето на секојдневните активности надвор од домот или работното место во претходниот период беше ограничено поради епидемијата на COVID-19, се препорачува постепено да се зголемува времетраењето и интензитетот на физичката активност секој ден. Кога играте рекреативни спортови, важно е да одржувате растојание од најмалку два метри од другите. Затоа, се советува да се изберат активности кои овозможуваат да се биде физички активен во општеството, а во исто време да се одржува препорачаното физичко растојание (возење велосипед, ролери, скејтборд, брзо одење, трчање, јога, бадминтон, тенис…).

Главните цели на националните и глобалните активности на денот на физичката активност (движењето) за здравје се:

– подигање на јавната свест за придобивките од физичката активност во спречување на хронични незаразни болести;

– промовирање на придобивките од физичката активност и укажување на добра практика;

– зголемување на спроведувањето на физичките активности на сите нивоа и во сите области (слободно време, транспорт, работа) и средини (училиште, заедница, дом, работно место);

– промовирање на здрав начин на живот и решавање на здравствени проблеми преку спорт и други физички активности, намалување на пушењето, здрава исхрана, намалување на насилството, стресот и социјалната изолација.

“ПОМИНИ УБАВО ВРЕМЕ!   БИДИ АКТИВЕН!”

Текстот е превземен од http://www.iph.mk/10-maj-megunaroden-den-na-fizickata-aktivnost-2/?fbclid=IwAR0wlXbA8ucQN1GLnkF1P4ZxRuEIp6loYY2yngsp7N8uqwNxWWtxbU2SDg0

Одделение по Социјална медицина при ЈЗУ Центар за јавно здравје - Струмица

Д-р Петар Пецев - Специјалист по Социјална медицина и јавно здравје